د معمار خبري آژانس د راپور له مخې، د قطر د بهرنيو چارو وزارت د طالبانو او پاکستان تر منځ د اوربند په اړه د خپلې اعلاميې نوې بڼه خپره کړې ده، چې پکښې د «پولې» کلمه د وروستۍ فقرې څخه ایسته سوې ده. دا بدلون نږدې ۱۸ ساعته وروسته له هغې رامنځته سوی چې د اعلاميې لومړۍ بڼه خپره سوې وه.
په لومړۍ نسخه کې د قطر د بهرنيو چارو وزارت هيله څرګنده کړې وه چې دا اوربند به «د دواړو ورونو هېوادونو تر منځ د پولې پر اوږدو د شخړو د کمېدو» سبب سي؛ خو په نوې نسخه کې د «د پولې پر اوږدو» عبارت له منځه تللی او يوازې د «د دواړو ورونو هېوادونو تر منځ د تاوتريخوالي د کمېدو» يادونه سوې ده.
په لومړۍ اعلاميه کې راغلي وو: «د قطر د بهرنيو چارو وزارت هيله څرګنده کړې ده چې دا مهم ګام به د دواړو ورونو هېوادونو تر منځ د پولې پر اوږدو د شخړو په کمېدو کې مرسته وکړي او د دايمي سولې لپاره به يوه ټينګه زمينه برابره کړي.»
د دې عبارت لرې کول په داسې حال کې سوی، چې سياسي شنونکي باور لري دا بدلون ښايي د دې لپاره سوی وي، څو د افغانستان او پاکستان تر منځ د سياسي او پولي حساسيتونو څخه مخنيوی وسي او د قطر بېطرفه منځګړيتوب وساتل سي. د طالبانو او پاکستان تر منځ خبرې اترې د قطر په پلازمېنه دوحه کې د قطر په منځګړتوب ترسره سوې وې، چې موخه يې د دواړو هېوادونو تر منځ د امنيتي او پولي تاوتريخوالي راکمول ښودل سوي دي.
