د معمار خبري آژانس د راپور له مخې، د افغانستان په چارو کې د استرالیا د ځانګړي استازي رسنیز دفتر د جمعې په ورځ (۱۵ د قوس) اعلان وکړ چې آماندا مکګرګور، د استرالیا ځانګړې استازې، د قطر له ځانګړي استازي فیصل الحنزاب سره لیدلي او خبرې یې ورسره کړي دي.
د استرالیا د ځانګړي استازي د رسنیز دفتر په وینا، په دې لیدنه کې د افغانستان بشري وضعیت په تفصیل سره څېړل سوی او دواړو لورو ټینګار کړی چې د افغان ښځو او سړو، انجونو او هلکانو د باعزته راتلونکي لپاره نړیوال تعهدات باید عملي سي.
آماندا مکګرګور په خپلو څرګندونو کې ویلي چې استرالیا د داسې افغانستان تمه لري چې له ځان او خپلو ګاونډیانو سره په سوله کې ژوند وکړي، او نړیواله ټولنه باید د دې هدف د تحقق لپاره اغېزناک رول ولوبوي.
