د طالبانو ټینګار پر دې چې له رسنیو او خبریالانو ملاتړ کوي د «رښتینی ژورنالیزم، باخبره خلک او سالمه ټولنه» په غونډه کې

د معمار خبري آژانس د راپور له مخې؛ د طالبانو سرپرست حکومت د اطلاعاتو او فرهنګ وزارت د « افغانستان د خلکو غږ میکانیزم» په همکارۍ (سه‌شنبه، د میزان لومړۍ نیټه) په کابل کې د «رښتینی ژورنالیزم، باخبره خلک او سالمه ټولنه» تر سرلیک لاندې غونډه وکړه چې موخه یې د خبریالانو د ظرفیت لوړونه، د رسنیزې همغږۍ پیاوړتیا او د موجودو ننګونو او فرصتونو ارزونه وه. په دې غونډه کې چې د طالبانو د لوړپوړو چارواکو، د ملي او نړیوالو خبري بنسټونو د استازو، د کورنیو رسنیو د رئیسانو او سلګونو خبریالانو په حضور ترسره سوه، د مسوولانه ژورنالیزم ارزښت او د هغه اغېز په عامه پوهاوي او د ټولنې په سلامتۍ وڅېړل سو. په دې غونډه کې دولتي چارواکو او د اړوندو بنسټونو مسئولانو د خلکو په پوهاوي او د ټولنې په سلامتۍ کې د رسنیو پر ارزښت ټینګار وکړ. شیخ نورالحق انور، د ادارې د چارو عمومي رئیس څرګنده کړه چې امارت اسلامي پر «رښتيني ژورنالیزم» باور لري او له هغو خبریالانو ملاتړ کوي چې مسلکي اصولو او بې‌طرفۍ ته ژمن پاتې سي. عتیق‌الله عزیزی، د اطلاعاتو او فرهنګ وزارت معین، وویل افغانستان د بېلابېلو قومونو ګډ کور دی او خبریالان باید د ملي روحيې د ژوندي ساتلو او د حقایقو د خپرولو لپاره هڅه وکړي. هغه زیاته کړه چې وزارت د رسنیو ملاتړ ته ژمن دی او دا غونډه د همدې ژمنتیا روښانه بېلګه ده. عبداللطیف نظری، د اقتصاد وزارت مسلکي معین، خبرداری ورکړ چې که رسنۍ کره او دقیق معلومات ورنه کړي، اوازې او پروپاګند به د ریښتینو خبرونو ځای ونیسي. عبدالمتین قانع، د کورنیو چارو وزارت ویاند، په پای کې وویل: کورنیو رسنیو د کونړ د طبیعي پېښې ښه انعکاس وکړ او وتوانېدې چې د خلکو غږ نړیوالو بنسټونو ته ورسوي. هغه زیاته کړه: د حقایقو انعکاس باید د اسلامي شریعت په چوکاټ کې وسي. قانع ټینګار وکړ: د کورنیو چارو وزارت به د خلکو د امنیت د تأمین لپاره خپلو هڅو ته دوام ورکړي.