د طالبانو مشر د بګرام په اړه د سلا مشورې لپاره ولایتي چارواکي کندهار ته وربللي دي

د معمار خبري آژانس د راپور له مخې، باوري سرچینو له کندهاره رسنیو ته ویلي چې هبت‌الله اخندزاده، د طالبانو مشر، ددې ډلې یو شمېر لوړپوړي چارواکي، په ځانګړي ډول والیان او ولسوالان، د بګرام د هوایي اډې د برخلیک په اړه د سلا مشورې لپاره کندهار ته وربللي دي. یاده ناسته د شنبې په سهار، د میزان په ۱۲مه، په کندهار کې پیل سوې او ویل کېږي چې درې ورځې به دوام ولري. باخبره سرچینو زیاته کړې چې د بګرام تر موضوع پرته، نور مهم مسایل هم د دې ناستې د اجنډا برخې دي. د سرچینو په وینا، د طالبانو مشر به په دې ناسته کې خپلو چارواکو ته د اطلاع‌رسونې، اداري نظم او د حکومت‌ولۍ د جوړښت د اصلاح په اړه سپارښتنې وکړي. همدارنګه تمه ده چې هبت‌الله اخندزاده په دې ناسته کې هغو قومندانانو او سیمه‌ییزو مسئولینو د لرې کولو لارښوونه هم وکړي چې دده له امرونو څخه یې کافي اطاعت نه‌دی کړی. تراوسه طالبانو د دې ناستې د محتوا په اړه رسمي څرګندونې نه‌دي کړې، او د دې ډلې اړوند رسنیو هم تراوسه رسمي جزئیات نه‌دي خپاره کړي.