د معمار خبری آژانس د راپور له مخې، د طالبانو د اطلاعاتو او فرهنګ وزارت اعلان کړی چې د لوحو او اعلانونو د اصلاح کمیسیون په خپل تازه اقدام کې، د کابل ښار په پنځمه ناحیه کې له ۲۰۰ څخه ډېرې اعلانیزې تختې له ژبني اړخه اصلاح کړي دي.
د وزارت په خبرپاڼه کې ویل سوي چې دا اقدام د طالبانو د ژبني او فرهنګي سیاستونو د پلي کولو په موخه ترسره سوی، خو په اړه یې دقیق جزئیات نه دي ورکړل سوي چې کوم ډول اصلاحات پکې سوي دي. خو د خپرو سویو انځورونو له مخې، په لوحو کې بدلونونه هغو کلمو او اصطلاحاتو ته اړوند دي چې له پښتو یا دري پرته عامیانه یا وارداتي بلل سوي، لکه «د خولې دننه برخه»، «دیش آنتن» او «قدس د حجامې مرکز».
ځینې سرچینې وايي، د دې اقدام موخه د رسمي ژبې له معیار سره د اصطلاحاتو همغږي کول او د بهرنيو یا له معیار سره د نا برابرو کلمو مخنیوی دی. خو انتقاد کوونکی دا کار د فرهنګي لاسوهنې او د سوداګرۍ او اعلان په برخه کې د بیان د ازادۍ محدودول بولي.
