د معمار خبري اژانس راپور له مخې، د پاکستان د بهرنیو چارو وزارت ویلي دي چې د طالبانو د سفیر مرستیال په اسلامآباد کې په دې تړاو راغوښتل سوی چې په وزیرستان شمالي کې د پاکستان د پوځ یو پوځي مرکز برید سوی وو او پاکستاني چارواکي د TTP څخه د طالبانو د ملاتړ له امله اندېښمن دي.
دغه اقدام وروسته له هغه وسو چې د جمعې په ورځ د خیبرپښتونخوا ایالت د وزیرستان شمالي سیمه کې پر یو پوځي مرکز برید وسو او څلور پاکستاني سرتېري ووژل سول. د TTP فعالې څانګې، د گل بهادر ډلې، د دې برید مسؤلیت پر غاړه واخیست.
د پاکستان د بهرنیو چارو وزارت په خپل اعتراض لیک کې ویلي دي: «د پاکستان ژوره اندېښنه د افغانستان د طالبانو د رژیم د دوامداره ملاتړ او تسهیلاتو له امله TTP ته رسېدلې؛ دا ملاتړ دغه ډلو ته اجازه ورکوي چې د پاکستان-افغانستان پر سرحد د امنیتي ځواکونو او عامو خلکو پر وړاندې ترهګریز بریدونه ترسره کړي.»
اسلامآباد څو ځله له طالبانو غوښتي چې د TTP د افغانستان له خاورې د پاکستان پر ضد د بریدونو مخه ونیسي، خو پاکستاني چارواکي وايي چې دغه غوښتنې تر اوسه هیڅ ملموسه نتیجه نه ده ورکړې. په وروستیو میاشتو کې د سرحدي بریدونو زیاتوالي، د کډوالو د جبري بیرته ستنولو او د ترهګرو ډلو د ملاتړ د یو بل پر ضد تورونو له امله د کابل او اسلامآباد تر منځ کړکېچ په پراخه کچه زیات سوی دی.
