نورالله نوري، د طالبانو د سرحدونو، قومونو او قبایلو وزیر، د پاکستان دفاع وزیر خواجه آصف د وروستیو څرګندونو په غبرګون کې خبرداری ورکړی چې د طالبانو صبر او حوصله باید ونه ازمویل سي. دغه خبرې په یوه ویډیو کې سوي چې د طالبانو د سرحدونو، قومونو او قبایلو وزارت لهخوا په ایکس پاڼه کې خپره سوې، خو د دغو څرګندونو دقیق ځای او وخت نهدی څرګند.
نوري ویلي: «د پاکستان له دفاع وزیره غواړو چې زموږ صبر او حوصله و نه ازمويي. تر اوسه مو صبر کړې، خو که اړ سوو، غبرګون به وښیو.» دا خبرداری په داسې حال کې مطرح کېږي چې خواجه آصف، د پاکستان دفاع وزیر، څو ورځې وړاندې ویلي وو، که له طالبانو سره د استانبول خبرې بېنتیجې پاتې سي، وضعیت ممکن په خطرناک ډول بدلون ومومي.
د اسلامآباد او طالبانو تر منځ ترینګلتیا وروسته له هغه زیاته سوې چې د پاکستانی طالبانو غورځنګ (TTP) بریدونه د افغانستان له خاورې څخه زیات سوي دي. پاکستان له طالبانو غواړي چې دغه ډله مهار کړي، خو طالبان د TTP له ډلې سره هر ډول مستقیمه همکاري ردوي. وروستۍ خبرې په استانبول کې هم پرته له دې چې کومه څرګنده هوکړه تر لاسه سي، پای ته رسېدلې دي.
