د طالبانو د بهرنیو چارو وزارت چارواکي: داسې ښکاري چې موږ په غلط لوري روان یو

د طالبانو د بهرنیو چارو وزارت د اقتصادي اړیکو مسئول شفیع اعظم په ایکس چینل کې لیکلي: “له بریا وروسته هدف دا و چې د نظام د ټینګښت له لارې د همدوی ملت ساتل، له مخالفو صفونو څخه افغانان را ایستل او د ملا هبت الله اصلي فلسفه عمومي عفوه وه.” د طالبانو د بهرنیو چارو وزارت د اقتصادي اړیکو مشر ویلي، داسې ښکاري چې موږ په غلطه لار روان یو او د دې پر ځای چې ملت جوړ کړو، هڅه مو وکړه چې خلک بې لارې کړو. د طالبانو د بهرنیو چارو د وزارت د اقتصادي اړیکو د مشر انتقادي خبرې کومه نوې خبره نه ده. پخوا هم د طالبانو چارواکو په وار وار د دې ډلې د مشرتابه پر پالیسیو، په ځانګړې توګه د “نجونو او ښځو لپاره د زده کړې د حقونو نشتوالی”، “د توکمیز ګډون نشتوالی” او “د بخښنې سرغړونې” په اړه انتقادونه کړي دي.