د طالبانو او پاکستان تر منځ د سرحدي کړکېچ له اتو ورځو وروسته د سپین بولدک بندر بیا پرانیستل سو د طالبانو نږدې رسنیو، په ځانګړي ډول ملي ټلویزیون، راپور ورکړی چې د قندهار ولایت سپین بولدک پوله ییز بندر د اتو ورځو تر تړل کېدو وروسته یو ځل بیا د سوداګریزو فعالیتونو لپاره پرانیستل سوی دی.
دغه بندر چې د افغانستان او پاکستان تر منځ د مهمو ترانزیټي لارو څخه شمېرل کېږي، د وروستیو سرحدي نښتو پر مهال د طالبانو او پاکستاني ځواکونو ترمنځ د شخړې له امله تړل سوی وو. په دې موده کې تګ راتګ یوازې په محدود ډول، او هغه هم د پاکستان څخه د افغان کډوالو د ستنېدو په موخه، وخت ناوخت ترسره کېده.
د سپین بولدک بیا پرانیستل په داسې حال کې ترسره کېږي چې په قطر کې د طالبانو او پاکستان د استازو تر منځ خبرې اترې د اوربند پر تړون پای ته رسېدلې دي. کارپوهان وایي افغانستان یو له هغو هېوادونو څخه دی چې پر وارداتي توکو ډېره تکیه لري، او د سوداګریزو بندرونو تړل کېدل د هېواد اقتصاد ته دروند زیان رسوي. عبدالظهور مدبر، یو اقتصادي کارپوه، وایي د دې بندر د سوداګرۍ بیا پیل کېدل کولای سي د دواړو خواوو پر سوداګرو اقتصادي فشار راکم کړي او د وروستیو کړکېچونو وروسته د سوداګریزو اړیکو د ښهوالي لامل سي.
