د طالبانو او پاکستان ترمنځ مخ په زیاتیدونکی تاوتریخوالی؛ د تورخم دروازه وتړل شوه

د معمار پرس د خبر له مخې؛ د طالبانو او پاکستان ترمنځ د تاوتریخوالي له زیاتوالي وروسته، د تېرې شپې (جمعه، حوت ۳مه) راهیسې د تورخم پوله د پاکستان له خوا د ټولو پر مخ تړل شوې ده. په تورخم کې د طالبانو کمیشنر عبدالجبار حکمت تایید کړه چې دا اقدام د ډیورنډ کرښې ته نږدې د طالبانو ځواکونو لخوا د نویو امنیتي پوستو د جوړولو په غبرګون کې شوی دی. هغه زیاته کړه: “هرکله چې افغان حکومت هڅه کوي چې په خپله خاوره کې امنیتي پوستې جوړې کړي، پاکستاني لوري پرته له خبرتیا پوله وتړي، چې د خلکو لپاره ستونزې رامینځته کوي.” په ورته وخت کې، سیمه ییزو سرچینو تایید کړې چې د لارې د تړلو وروسته، د پولې دواړو غاړو ته سلګونه مسافر بند پاتې دي او له جدي ستونزو سره مخ دي. د پولې د بیا پرانیستلو هڅې د ډیپلوماتیکو خبرو اترو له لارې روانې دي.