د معمار خبري آژانس د راپور له مخې، محمد نعیم، د طالبانو د حکومت د بهرنیو چارو وزارت مرستیال، د ایران د بهرنیو چارو د وزارت له مرستیال مهدي سبحاني سره په لیدنه کې وویل چې طالبان له ګاونډیو هېوادونو سره د «متوازنو او متقابلو» اړیکو په رامنځته کولو باور لري او د هر ډول ستونزې د حل لپاره خبرې او تفاهم خپل لومړیتوب بولي. د طالبانو د بهرنیو چارو وزارت په یوه خبرپاڼه کې ویلي چې په دې لیدنه کې دواړو لوریو د دوه اړخیزو اړیکو پیاوړتیا، د ایران مېشتو افغانانو لپاره د قونسلګري خدمتونو لوړول، او په بېلابېلو دیپلوماتیکو برخو کې د لا زیاتې همغږۍ پر موضوعاتو خبرې کړي دي.
د ایران د بهرنیو چارو وزارت مرستیال ویلي چې تهران غواړي له افغانستان سره اړیکې پراخې کړي او له هر هغه اقدام سره مخالف دی چې د سیمې سولې او ثبات ته ګواښ پېښ کړي. دا لیدنه په داسې حال کې ترسره کېږي چې د طالبانو او پاکستان تر منځ د کړکیچونو په زیاتېدو سره ایران خپل دیپلوماتیک فعالیتونه له دواړو لوریو سره پراخ کړي دي. همدارنګه، طالبانو له ایران سره اقتصادي همکاري زیاته کړې ده؛ تر دې ځایه چې طالبانو افغان سوداګرو ته لارښوونه کړې چې د صادراتو لپاره بدیلې لارې پیدا کړي.
