د معمار خبري اژانس د راپور له مخې، د طالبانو تر ادارې لاندې ملي تلویزیون د اچکزي له قوله ویلي چې د بندر د بیا پرانیستلو لپاره هڅې روانې دي، او د افغانستان او پاکستان د چارواکو تر منځ له وروستیو خبرو وروسته، تخنیکي او اداري خنډونه د لرې کېدو په حال کې دي.
د سپین بولدک بندر، چې د افغانستان او پاکستان تر منځ له مهمو سوداګریزو لارو څخه شمېرل کېږي، په وروستیو ورځو کې یوازې د افغان کډوالو د ستنېدو لپاره خلاصه وه، خو د سوداګریز تګ راتګ پر مخ بنده وه. د دغه بندر بیا پرانیستل کولای سي د دواړو هېوادونو پر سوداګرو اقتصادي فشار راکم کړي او د صادراتو او وارداتو بهیر، په ځانګړي ډول د افغانستان په جنوبي ولایتونو کې، بېرته عادي حالت ته راولي.
