د معمار خبري آژانس د راپور له مخې، برشنا شرکت ویلي چې د افغانستان په شمال کې د تیرې شپې زلزلې له امله د وارداتي برېښنا اصلي لینونه تخریب سوي او په نتیجه کې یې په کابل، بغلان، پروان، پنجشیر، کاپیسا، لوګر، پکتیا، غزني او میدان وردګ ولایتونو کې برېښنا په بشپړ ډول پرې سوې ده.
په خپره سوې خبرپاڼه کې راغلي چې د برشنا تخنیکي ډلې د زیانمنو سویو مزو د ترمیم او د برېښنا د بېرته وصلولو لپاره سیمو ته استول سوې دي، خو تراوسه نهدي توانېدلي چې برېښنا بېرته فعاله کړي. دغه راز، برشنا شرکت زیاته کړې چې د تاجکستان له لوري وارداتي برېښنا هم د کندز ولایت په مسیر کې پرې سوې او هغه ولایتونه چې له دې لین څخه تغذیه کېدل، له برېښنا بېبرخې سوي دي.
دا دوهم ځل دی چې په لږه موده (د دوو اوونیو په دننه کې) د ازبکستان وارداتي برېښنا پرې کېږي. نږدې یوه اوونۍ وړاندې هم د همدې هېواد برېښنا پرې سوې وه او طالبان تر لسو ورځو وروسته وتوانېدل چې دا شبکه بېرته فعاله کړي. د ژمي په موسم کې د برېښنا بیا پرې کېدل د هېواد د اوسېدونکو او د برېښنا پر صنعتونو د اندېښنې سیوری غوړولی دی.
