د معمار خبري آژانس د راپور له مخې، رمضان بشر دوست، چې د افغانستان د ولسي جرګې پخوانی غړی دی، د کابل لوېدیځ کې د معرفت لیسې د فارغانو په فراغتي مراسمو کې په خپله وینا کې د هېواد پر پخوانیو سیاسي مشرانو سخته نیوکه وکړه او هغوی یې په فساد، بېکفایتۍ او د ملي ګټو پر وړاندې په بېپامۍ تورن کړل.
بشر دوست وویل چې د افغانستان په پنځهزره کلن تاریخ کې هېڅ داسې رهبر یا حاکم نه دی تېر سوی، چې د هېواد د اوبو د مهار او مدیریت لپاره یې جدي ګامونه پورته کړي وي.
هغه ټینګار وکړ چې افغانستان دا مهال د اوبو له کمښت، فقر او شاتګ سره مخ دی، خو بیا هم د هېواد اوبه پرته له هر ډول پلان او مدیریت نورو هېوادونو ته بهېږي.
رمضان بشر دوست تل د فساد او سیاسي بېکفایتۍ له سختو منتقدینو څخه شمېرل کېږي، او په خپلو عامه ویناوو کې تل د پخوانیو مشرانو کړنې په ښکاره ډول نقدوي.
د هغه تازه څرګندونې هم د هېواد د طبیعي سرچینو، په ځانګړي ډول د اوبو د مدیریت په برخه کې د کمزوري وضعیت پر وړاندې د اندېښنو یو انعکاس بلل کېږي.
