د خوړو د نړیوال پروګرام د مرستو په کمیدو سره د میندو او ماشومانو روغتیا ته ګواښونه

د خوړو نړیوال پروګرام له خوا د غذايي خوړو د ترلاسه کوونکو له لست څخه د ۶۰۰۰۰۰ امیندوارو میرمنو ایستل د افغان میرمنو د راتلونکي لپاره یو جدي خطر بللی دی. دغه پریکړه چې د بودیجې د کمښت له امله نیول شوې، په هیواد کې د بشري ناورین پراخ ابعاد څرګندوي او د میندو او ماشومانو روغتیا ته جدي ګواښ ګڼل کیږي. د بودیجې نشتوالی د دې بشري ناورین یوازینی لامل نه دی. پرله پسې وچکالۍ، داخلي شخړې، اقتصادي بندیزونه او سیاسي بې ثباتي ټول د دې لامل شوي چې افغانستان په نړۍ کې د خوراکي توکو تر ټولو سخت بحران جوړ کړي. دا بحران نه یوازې د امیندوارو میندو او ماشومانو فزیکي روغتیا ګواښي، بلکې د افغانستان د راتلونکي نسل وده او پرمختګ هم له خطر سره مخامخ کوي. د خوړو له پروګرام څخه د امیندوارو میرمنو لرې کول به په هیواد کې د میندو او ماشومانو روغتیا ته نه جبران کیدونکي پایلې ولري. د امیندوارۍ پرمهال خوارځواکي د وخت څخه مخکې زیږون، د زیږون کم وزن، په ماشومانو کې د اوږدمهاله ناروغیو خطر او حتی د مور د مړینې لامل کیدی شي. همدارنګه، د امیندوارۍ په جریان کې د غذايي موادو نشتوالی کولای شي د ماشوم دماغ او د معافیت سیسټم په پراختیا منفي اغیزه وکړي. د دې بحران سره د مقابلې لپاره، موږ په ملي او نړیواله کچه بیړني او همغږي اقدام ته اړتیا لرو. د بشردوستانه مرستو زیاتوالی، د کرنې په سکتور کې پانګونه، د کارموندنې رامنځته کول او د کورنیو تولیداتو ملاتړ د هغو مهمو حل لارو څخه دي چې کولای شي په افغانستان کې د خوراکي توکو وضعیت ښه کولو کې مرسته وکړي. د دې ترڅنګ د افغانستان انزوا او د افغانستان د اقتصاد په ښه کولو کې د نړیوالې ټولنې نه ګډون، چې د طالبانو د سیاستونو له امله رامنځ ته کېږي، نور هغه لاملونه دي، چې له بنسټیزو اړتیاوو څخه یې محرومیت زیات کړی دی. څرنګه چې امیندوارۍ یوه مهمه او حساسه مرحله ده او د صحي او مغذي خوړو نشتوالی د مور او ماشوم په روغتیا مستقیم اغیز لري. د خوړو له پروګرام څخه د ۶۰۰۰۰۰ امیندوارو میرمنو ایستل یو بشري ناورین دی چې د نړیوالې ټولنې جدي پاملرنې ته اړتیا لري. د وضعیت د خرابیدو د مخنیوي لپاره باید په افغانستان کې د خوراکي توکو د بحران د حل لپاره سمدستي او اغیزمن ګامونه پورته شي. که نه نو د افغانستان راتلونکی نسل به له جدي ننګونو سره مخ شي او د ميندو او نويو زېږېدلو ماشومانو روغتيا به له جدي خطرونو سره مخ شي.