د خلکو ارادې ته پاملرنه د انزوا څخه د خلاصون یوازینۍ لار ده

په افغانستان کې د ایران سفیر او ځانګړي استازي حسن کاظمي قمي ویلي، هېواد یې د هر هغه اقدام ملاتړ کوي چې په افغانستان کې شته ننګونې حل کړي. هغه زیاته کړه: هغه به د ملګرو ملتونو د ځانګړي استازي د ټاکلو په ګډون په افغانستان کې د وضعیت د ښه والي لپاره همکاري وکړي. په کابل کې د ایران سفیر د ملګرو ملتونو د ځانګړي استازي د وړتیاوو په روښانه کولو ټینګار وکړ او ویې ویل: هر هغه اقدام چې رغنده وي او په افغانستان کې د شرایطو له ښه والي سره مرسته کوي باید هرکلی یې وشي. کاظمی قمی د افغانستان د ملی حاکمیت په رسمیت پیژندلو موضوع ته په اشارې سره وویل: د دولتونو په رسمیت پیژندل د دغه هیواد د خلکو په ارادې پورې اړه لری، مونږ څو څو ځله دا خبره مطرح کړې ده چې د افغانستان خلک څه وایی مونږ به تصمیم نیسو. د ایران سفیر په دوام کې د افغانستان پرمختګونه د ګاونډیو هېوادونو د ملي امنیت پر ګټو اغېزمن وبلل او زیاته یې کړه: نړۍ باید دا ومني چې په افغانستان کې د ستونزو او د ترهګرۍ د مسلې په اړه د اندېښنو د حل لپاره له افغانستان سره سیمه ییزې اجماع او د هېوادونو ګډې همکارۍ ته اړتیا ده. د افغانستان پرمختګونو تل د سیمې پر هېوادونو اغېز کړی او د افغانستان هر ګاونډی په بېلابېلو مسایلو کې په یوه نه یوه ډول خپله اندېښنه څرګندوي. د افغانستان سیاسي وضعیت داسې دی چې د نړۍ ډېر هېوادونه له اوسني وضعیت څخه د وتلو لپاره د حل لارې په لټه کې دي. ځینې ​​یې د سیمه ییز رول وړاندیز کوي او ځینې یې د ملګرو ملتونو پر دریځ او د دغه بنسټ له خوا د ځانګړي استازي پر ټاکلو ټینګار کوي. په هیواد کې سیاسي جوړښت د طالبانو په واک کې دی او خلک د هیواد په اداره کې هیڅ رول نلري. پر دې سربېره په سیاسي جوړښت کې د خلکو نه ګډون او د ګڼو محدودیتونو لګول د دې لامل شوي چې د خلکو او حکومت ترمنځ واټن زیات شي؛ په پایله کې د هېواد لاره له بېلابېلو خنډونو سره مخ ده. له بلې خوا په افغانستان کې د ترهګرو ډلو شتون او فعالیت هم په سیمه کې د دغه هیواد لپاره یوه لویه اندیښنه ګرځیدلې ده. د افغانستان ګاونډیانو په وار وار له طالبانو غوښتي چې له افراطي ډلو سره په مقابله کې قاطعانه عمل وکړي او پرې نه ږدي چې افغانستان د دغو ډلو په ځاله بدل شي. د افغانستان تاریخ ثابته کړې چې تر څو چې ولس له حکومت سره همکاري او تعامل ونه کړي، دا کار به نه یوازې د واکمنانو لپاره ستونزمن وي، بلکې په هیواد کې د ناغوښتل شویو پرمختګونو ویره به ډیره شي. له اوسني وضعیت څخه د افغانستان د وتلو لپاره د نړیوالې ټولنې ګډې او هر اړخیزې همکارۍ ته اړتیا ده. د افغانستان دولت هم باید په دې برخه کې د خلکو اجتماعي ارادې او غوښتنو ته پام وکړي، ترڅو هېواد د پرمختګ او آبادۍ په لور روان شي.