د معمار خبری آژانس د راپور له مخې، ګلبدین حکمتیار، د افغانستان د اسلامي حزب مشر، په یوه پرانیستې لیک کې د پاکستان پارلمان او د پاکستان خلک خبر کړي چې د کابل او اسلامآباد اړیکې د خطرناکې ترینګلتیا او احتمالي شخړې پر لور روانې دي، او د اوسني وضعیت دوام کولای سي دواړو هېوادونو ته نهجبرانېدونکي زیانونه ورسوي.
حکمتیار په لیک کې ویلي چې میلیونونه افغان مهاجر د خپلو کورونو پرېښودو ته اړ سوي، او دا ډول چلند له مسلمان ولس سره د اسلامي اخلاقو او انساني اصولو خلاف دی. هغه زیاته کړې چې د افغانستان ملت تل د خپلو ګاونډیانو د ناسم سیاستونو قرباني سوی، او نظامي ګواښونه او فشارونه هېڅکله د دواړو هېوادونو ترمنځ ستونزې نه سي هوارولای.
حکمتیار د خپل لیک په بل ځای کې د شوروي اتحاد د جګړې دورې ته په اشارې لیکلي چې د شوروي پوځونه یوازې د افغانستان د اشغال لپاره نه راتلل، بلکې شعار یې دا وو: «موږ به خپل د بوټانو بندونه د کراچۍ په غاړه خلاص کړو.»
د حکمتیار په وینا، که د افغانانو مقاومت نه وای، نن به پاکستان اړ سوی وای چې د شوروي پر ضد په مستقیمه جګړه کې ښکېل سي. هغه همدارنګه ټینګار کړی چې د پاکستان هستوي ځواک ته رسېدل د افغان ولس د جهاد مستقیمه پایله ده، او اسلامآباد باید دا تاریخي حقیقت هېر نه کړي.
