د معمار خبري آژانس د راپور له مخې؛ د طالبانو د اطلاعاتو او کلتور وزارت مطبوعاتي دفتر نن سهشنبه، ۲۷ د عقرب، خبر ورکړ چې مولوي عتیقالله عزیزی، د دې وزارت د کلتور او هنر مرستیال، په خپل کاری دفتر کې د جاپان سفیر ماساموتو کِینیچي سره وکتل او خبرې یې وکړې.
د دې لیدنې په پیل کې، مولوي عزیزی د جاپان هیواد هڅې ستایلي چې د افغانستان د لرغوني او تاریخي آثارو د ساتنې او بیا رغونې په برخه کې ترسره سوي، او ټینګار یې وکړ چې دغه مرستې د هیواد د کلتوري میراث د ساتنې لپاره خورا ارزښتناک او مؤثره دي.
له بلې خوا، د جاپان سفیر د تاریخي میراث د ساتنې لپاره ترسره سوي اقدامات د پام وړ وبلل او زیاته یې کړه چې د افغانستان لرغونی تمدن نړیوال اهمیت لري او د تاریخي آثارو ساتنه د ټولو هیوادونو لپاره ګډ مسؤلیت دی. ماساموتو کِینیچي هم د طالبانو اقدامات د تاریخي آثارو د قاچاق د مخنیوي، د فساد سره د مبارزې او د مخدره موادو پر وړاندې د مبارزې په برخه کې بریالي او ارزښتناک وبلل. دغه لیدنې د افغانستان او جاپان ترمنځ د کلتوري اړیکو د پیاوړتیا او د ګډو همکاریو د دوام په اړه مثبت پیغام ورکړ او د ملاتړ او کلتوري پروګرامونو د پراختیا زمینه یې برابره کړه.
