د تورخم په سرحدي سیمه کې د طالبانو او پاکستان ترمنځ نښته شوې

د معمار پرس د خبر له مخې؛ ځايي سرچینو تایید کړې چې د تورخم په پوله کې د طالبانو او پاکستاني سرحدي ساتونکو ترمنځ سخته نښته شوې ده. دا نښته تېره شپه (د حوت ۱۳مه) د ډیورنډ کرښې ته نږدې پیل شوه او دواړو خواوو سپکې او درنې وسلې وکارولې. د ترلاسه شویو معلوماتو له مخې، شخړه هغه وخت پیل شوه کله چې طالب جنګیالیو هڅه وکړه چې د پولې هاخوا یوه امنیتي پوسته جوړه کړي، او دا اقدام د پاکستاني سرحدي ساتونکو له غبرګون سره مخ شو. تر اوسه پورې د احتمالي تلفاتو په اړه کوم راپور نه دی خپور شوی، او طالبانو هم په دې اړه تبصره نه ده کړې. دا نښتې په داسې حال کې دوام لري چې د تورخم لاره د امنیتي کړکیچونو له امله له لسو ورځو څخه زیاته موده تړل شوې ده.