د معمار خبري اژانس د راپور له مخې، د ترکیې پولیسو د بوردور ښار د ګلحصار په سیمه کې د پراخو عملیاتو پر مهال لږ تر لږه ۱۷ هغه افغان پناه غوښتونکي نیولي چې قانوني اسناد یې نه لرل.
د ترکیې د رسنیو د راپورونو پر بنسټ، د دغو پناه غوښتونکو د «غیرقانوني تنظیم» په تړاو څلور نور کسان هم نیول سوي او عدلي ارګانونو ته معرفي سوي دي.
نیول سوي پناه غوښتونکي د اداري او رسمي پروسو تر بشپړېدو وروسته د بهرنیو اتباعو د اخراج مرکزونو ته لېږدول سوي دي. همدارنګه، د یوه پناه غوښتونکي څخه یو اندازه هیروئین موندل سوي او ضبط سوي دي.
په وروستیو کلونو کې ترکیې، په ځانګړي ډول د افغان پناه غوښتونکو د نیولو او شړلو بهیر چټک کړی دی. د ترکیې د کورنیو چارو وزارت شمېرې ښيي چې په تېر یو کال کې لږ تر لږه ۳۱ زره افغان پناه غوښتونکي د «غیرقانوني داخلېدو او د استوګنې د اسنادو د نشتون» په تور نیول سوي دي.
دا اقدامات د ترکیې د هغو هڅو برخه بلل کېږي چې غواړي دې هېواد ته د کډوالو او پناه غوښتونکو غیرقانوني داخلېدل او استوګنه کنټرول کړي.
