د معمار پرس د خبر له مخې؛ د هرات ولایت د والي د رسنیو دفتر نن، د سې شنبې په ورځ، د اسد په ۱۴مه، په یوه بیانیه کې وویل چې د ترکمنستان د اورګاډي بورډ، چې مشري یې د دې هیواد د اورګاډي ادارې د ګډو ونډو شرکتونو اجرایوي رییس قربانوف سردار کوي، د هرات له والي شیخ نور احمد اسلامجار سره د تور غونډۍ بندر د پراختیا او د دې بندر لپاره د نویو هنګرونو د جوړولو په اړه خبرې وکړې او اعلان یې وکړ چې د تور غونډۍ بندر لپاره د هنګرونو جوړول به ډیر ژر پیل شي.
د ترکمنستان د اورګاډي بورډ ریاست زیاته کړه چې د دې پروژې لپاره ټول کارګران به د افغان اتباعو څخه وګمارل شي او له سیمه ییزې ادارې څخه یې وغوښتل چې د دې پروژې د کار په اسانتیا کې همکاري وکړي.
د هرات والي اسلام جار د پروژې د پیل هرکلی وکړ او د ترکمن پلاوي ته یې ډاډ ورکړ چې سیمه ییزه اداره به د پروژې په پلي کولو کې بشپړه همکاري وکړي.
