د معمار خبري اژانس د راپور له مخې؛ د بشري حقونو د فعالانو اتحاد ویلي چې کلتوري نسلوژنه د غږونو چپ کول او د پوهاوي بندول دي. دغه بنسټ د یکشنبې په ورځ، د قوس ۲۴مه، په خپلې ایکس پاڼه کې لیکلي چې په افغانستان کې پر زدهکړو لګول سوي محدودیتونه منفي پایلې لري او د نويو نسلونو راتلونکی له ګواښ سره مخ کوي.
دغه بنسټ ټینګار کړی چې طالبان د زدهکړو د دروازو په تړلو، د محصلینو په ځپلو او د ټولنې د کلتوري حافظې په له منځه وړلو سره، د ټولنې د راتلونکي د نابودۍ هڅه کوي. هغوی زیاته کړې چې د ځوان نسل راتلونکی یوازې د پوهې، ازادۍ او انساني کرامت له لارې معنا پیدا کولی سي.
دا په داسې حال کې ده چې په افغانستان کې د طالبانو له واکمنېدو وروسته، د هېواد پر تعلیمي نظام پراخ محدودیتونه لګول سوي دي. د دغو محدودیتونو له مخې، د شپږم ټولګي پورته انجونې او ښځینه محصلینې له ښوونځیو او پوهنتونونو منع سوې دي، ګڼ شمېر ښځینه استادانو خپلې دندې له لاسه ورکړې دي، په تحصیلي رشتو کې بدلونونه رامنځته سوي او د ځینو کتابونو خپرول او پلور هم منع سوي دي.
