د معمار پرس د خبر له مخې؛ د آیسلینډ په مشرۍ یو شمیر هیوادونو د ملګرو ملتونو د بشري حقونو شورا څخه غوښتنه کړې چې په افغانستان کې د بشري حقونو د پراخو سرغړونو په اړه بیړني اقدام وکړي.
په یوه ګډه اعلامیه کې، دغو هیوادونو د یو تحقیقاتي خپلواک میکانیزم د جوړولو غوښتنه وکړه.
د ملګرو ملتونو ځانګړي راپور ورکوونکي رچرډ بینټ خبرداری ورکړی چې د نړیوالې ټولنې بې اقدامۍ طالبان د بشري حقونو د لا زیاتو سرغړونو لپاره هڅولي دي.
هغه مخکې د جرمونو د ثبت او عدالت د تامین لپاره د یو میکانیزم د جوړولو غوښتنه کړې وه.
له ۲۰۲۱ کال راهیسې، د بشري حقونو سازمانونو په وار وار په افغانستان کې د بشري حقونو د سرغړونو د څېړلو لپاره د یو خپلواک میکانیزم د جوړولو غوښتنه کړې ده.
دوی ټینګار کوي چې دا ډول میکانیزم کولای شي د عدالت په تعقیب کې په ځانګړې توګه د ښځو او نجونو لپاره مرسته وکړي.
