د معمار خبری آژانس د راپور له مخې، د بخښنې نړیوال سازمان په خپل تازه بیانیه کې د افغان ښځو او انجونو حالت«نهزغمونکی» بللی او ویلي یې دي چې طالبانو په سیستماتیک ډول ښځې له نږدې ټولو ټولنیزو او عامه برخو څخه ایستلې دي. په دې بیان کې ویل سوي چې طالبان د زدهکړې، کار، تګ راتګ، جامو، او روغتیايي خدمتونو په برخه کې د سختو محدودیتونو په لګولو سره د ښځو بنسټیز بشري حقوق او انساني کرامت په پراخه او قصدي توګه تر پښو لاندې کړي دي. د بخښنې نړیوال سازمان دا کړنې د «جنسیتي توپیر یا جنسیتي اپارتاید» څرګنده بڼه بللې ده.
یاد سازمان له نړیوالې ټولنې غوښتی چې د افغانستان له زړورو ښځو او انجونو سره ودرېږي او د طالبانو مشران د بشري حقونو د نقض په اړه د قانون مخې ته راولي. په اعلامیه کې ټینګار سوی چې د نړۍ چوپتیا او بېعملۍ د طالبانو د ظلم دوام ته زمینه برابروي او دا چاره د بشري حقونو د ناقضانو لپاره په ټوله نړۍ کې خطرناک پیغام استوي.
د بخښنې نړیوال سازمان له نړیوالو هېوادونو غوښتنه کړې چې د طالبانو د فشار لپاره حقوقي او سیاسي لارې چارې وکاروي، څو د افغانستان ښځې له اوسني نه زغمونکی وضعیت څخه خلاصې سي. یاد خبرداری په داسې وخت کې خپرېږي چې نړیوالو بنسټونو بیا بیا ویلي، د طالبانو له واکمنېدو وروسته د ښځو پر وړاندې محدودیتونه په تېرو دوه لسیزو کې بېساري دي، او لا هم د نرمښت یا بدلون هېڅ نښه نه ترسترګو کېږي.
