د معمار پرس د خبر له مخې؛ د ایران د کورنیو چارو وزارت د بهرنیو کډوالو د چارو د مرکز مشر نادر یاراحمدي د هغو افغان کډوالو د برخلیک د ټاکلو اعلان وکړ چې د سرشمیرنې اسناد لري او ویې ویل چې د ۱۴۰۴ کال د حمل له لومړۍ نیټې څخه، خدمات لکه روغتیا پاملرنه، درملنه، د املاکو معامله، تعلیم او نور به یوازې هغه مهاجرینو ته وړاندې شي چې قانوني استوګنه لري.
ښاغلي یاراحمدي د یکشنبې په ورځ (د حوت ۱۹مه) ایسنا خبري اژانس ته وویل چې ټول بهرني کډوال باید د کډوالۍ څانګې د پالیسیو او پروګرامونو سره همکاري وکړي ترڅو په ایران کې په قانوني توګه ژوند وکړي، که نه نو دوی به غیر قانونی وګڼل شي.
هغه څرګنده کړه چې په ۱۴۰۰ کال کې له افغانستان څخه د کډوالۍ له لویې څپې وروسته، ایران د غیرقانوني کډوالو په شمیر کې له زیاتوالي سره مخ شو.
له همدې امله، د ایران حکومت د افغان کډوالو د سرشمېرنې او تنظیم لپاره ګامونه پورته کړي دي ترڅو د دوی د استوګنې حالت معلوم کړي.
هغه د کډوالو د سازمان د پلان او د افغان کډوالو د سرشمېرنې په پلي کولو ټینګار وکړ او ویې ویل چې د هغو کډوالو لپاره چې په دې شپږو کټګوریو کې نه راځي، افغانستان ته د راستنیدو لپاره هیڅ خنډ نشته.
په پایله کې، شپږ ډلې پیژندل شوي چې کولی شي په ایران کې پاتې شي:
هغه جوړې چې یو یې د آمایش کارت لري او بل یې د سرشمیرنې فورمه لري.
هغه کورنۍ چې یو نفر له والدین یې د آمایش کارت لري او بل غړي یې د سرشمیرنې فورمه لري.
هغه کسان چې د اعتبار وړ پاسپورټ لري خو ویزه یې پای ته رسیدلې وي، کولای شي د جریمې له ورکولو وروسته نوې ویزه ترلاسه کړي.
هغه خلک چې د کار پېژندپاڼه یا د کار کارت لري او کولای شي په ټاکل شوې نیټې کې قانوني اسناد ترلاسه کړي.
هغه اشخاص چې د پخواني افغان حکومت په وخت کې پوځي پرسونل، کارمندان یا حکومتي چارواکي وو، د نړیوالو سازمانونو سره په همغږۍ کې د دوی د استوګنې حالت ټاکلو لپاره.
هغه کسان چې له ایران څخه وځي، پاسپورټ ترلاسه کړي او په قانوني توګه داخل شي.
یاراحمدي همدارنګه ټینګار وکړ چې د ۱۴۰۴ کال څخه به افغان زده کونکي یوازې د قانوني اسنادو (پاسپورټ او آمایش کارت) سره د زده کړې دوام حق ولري.
هغه کورنۍ چې د ښوونځي عمر لرونکي ماشومان لري او په دې شپږو ډلو کې نه راځي، کولای شي د دریو میاشتو لپاره د وتلو لنډمهاله اجازه ترلاسه کړي تر هغه چې د دوی ماشومان خپل تعلیمي کال بشپړ کړي.
د دې چارواکي په وینا، د کډوالو چارو اداره کولو یوازینۍ اداره د ایران د کورنیو چارو وزارت د کډوالو چارو مرکز دی، او د دې مرکز له اجازې پرته د نورو ادارو لخوا وړاندې شوي خدمات به قانوني نه وي.
