د ايران د فارس ولايت کې د سرشمېرنې کارت لرونکو مهاجرو حضور ناقانونه اعلان شو

د معمار پرس د راپور له مخې، د ايران د فارس ولايت د مهاجرو او بهرنيو اتباعو عمومي مدير بهرنگ قرباني پرون په شيراز کې د مهاجرو د تنظيم په غونډه کې وويل چې د سرشمېرنې په نامه کارت لرونکو بهرني اتباع بايد ژر تر ژره د دې ولايت او هېواد څخه ووځي. د ایرنا د خبر له مخې، هغه زياته کړه چې د دغو کسانو سره د هر ډول خدمت رسونه منع او د قانون خلاف دی او دا کسان د ناقانونه بهرنيو اتباعو په ډله کې شامل دي او په فارس ولايت کې د دوى اوسېدل، کار کول او د اولادونو زده کړه منع ده او د مهاجرو چارو عمومي مديريت څارونکي ټولنه، د کورونو مالکان او د ښوونځيو مديران چې دغو اتباعو ته خدمتونه وړاندې کوي، له دوسیې جوړولو وروسته عدلي او قضايي ارګانونو ته معرفي کوي.