د معمار خبري آژانس د راپور له مخې؛ د ملګرو ملتونو د امنیت شورا نن چهارشنبه د افغانستان له خاورې څخه د نړۍوالې سولې او امنیت پر وړاندې د رامنځته کېدونکو امنیتي ګواښونو په تړاو ناسته ترسره کوي، چې پکښې د داعش ډلې ګواښونه په ځانګړي ډول تر ارزونې لاندې نیول سوي دي.
د ملګرو ملتونو د سرمنشي د هغه راپور پر بنسټ، چې د جنورۍ په ۳۱مه د امنیت شورا غړو ته سپارل سوی، د داعش له لوري رامنځته کېدونکی ګواښ په پرلهپسې ډول د زیاتېدو په حال کې دی او دغه وضعیت، په ځانګړي ډول د افریقا په لویه وچه کې، د اندېښنې وړ بلل سوی دی.
په راپور کې د داعش خراسان څانګې پر ګواښ ټینګار سوی او ادعا سوې ده چې دغه ډله د افغانستان په شمالي او سرحدي سیمو کې فعالیت لري.
دا په داسې حال کې ده چې د طالبانو ډلې بیا بیا ادعا کړې، چې داعش په افغانستان کې ځپل سوی او دا ډله د افغانستان له خاورې څخه د نورو هېوادونو د زیانمنولو وړتیا نه لري.
