د معمار خبري آژانس د راپور له مخې؛ د امریکا د کورني امنیت وزارت اعلان کړی چې د جو بایډن د ولسمشرۍ پر مهال، ډېر شمېر د افغانستان اتباع پرته له دې چې د دوی د شالید او هویت بشپړه څېړنه وسي، متحده ایالاتو ته داخل سوي دي. دغه وزارت د یوه راپور په خپرولو سره ویلي چې څو تنو د افغانستان اتباعو امریکا ته له داخلېدو وروسته «سخاوت ته په تاوتریخوالي ځواب ورکړی» او په جنایي او امنیتي پېښو کې ښکېل پاتې سوي دي.
د امریکا د کورني امنیت وزارت د یکشنبې په ورځ، د قوس نهمه، په خپل ایکس پاڼه لیکلي چې ایمل ولي، یو د افغانستان تبعه چې د بایډن د حکومت په وخت کې د «متحدانو ته ښه راغلاست» عملیاتو له لارې امریکا ته داخل سوی وو، د یوې امنیتي پوستې په جریان کې د ویرجینیا دوه پولیس افسران په ډزو وویشتل او ټپیان یې کړل. هغه وروسته له دې چې ویلي یې وو «ما باید طالبانو ته خدمت کړی وای»، د پولیسو په متقابل اور کې ووژل سو. په راپور کې راغلي چې په بله پیښه کې، عبدالله حاجيزاده او نصیر احمد توحیدي، دوه تنه افغان اتباع چې د بایډن حکومت دوی ته قانوني حالت ورکړی وو، د ۲۰۲۴ ټاکنو پر مهال د یوې ترهګریزې حملې د پلان کولو په تور په اوکلاهما ښار کې نیول سوي دي. د امریکایي چارواکو په وینا، دوی سلګونه فیره مهمات لرل او له داعش سره یې بیعت کړی وو.
همدارنګه، د امریکا د کورني امنیت وزارت ویلي چې محمد خاروین، د افغانستان تبعه چې نوم یې د ترهګریزو څارلو کسانو په لست کې وو، په ۲۰۲۴ کال کې د سرحدي ګزمو لخوا نیول سوی وو، خو وروسته د بایډن حکومت له لوري خوشې سوی وو. هغه له یو کال څخه د زیات آزاد ژوند وروسته یو ځل بیا په امریکا کې ونیول سو. راپور زیاتوي چې جاوید احمدي، یو غیرقانوني افغان تبعه، هم په ۲۰۲۵ کال کې د امریکا د مهاجرت او ګمرک ادارې لخوا نیول سوی او د «دوهمې درجې وهلو ټکولو» په جرم محکوم سوی دی، خو له دې وړاندې د بایډن حکومت هغه ته د اقامت اجازه ورکړې وه. همدارنګه ویل سوي چې بهرالله نوري، یو بل افغان تبعه، له امریکا څخه د وتلو وروسته په فورت مککوی ویسکانسین کې نیول سوی او د قانوني سن نه ټیټ عمر لرونکي کس سره د جنسي عمل هڅې په تور متهم سوی دی.
د امریکا د کورني امنیت وزارت د معلوماتو له مخې، ذبیحالله مهمند، یو بل افغان تبعه چې د بایډن حکومت په مونتانا ایالت کې ځای پر ځای کړی وو، په میسولا ښار کې د یوه هوټل په کوټه کې پر یوې انجلۍ په جنسي تېري تورن سوی او قضیه یې روانه ده. د امریکا د کورني امنیت وزارت په پای کې ټینګار کړی: «دغه کسان یوازې د هغو کسانو څو بېلګې دي چې ویل کېږي د بایډن د حکومت له لوري په بشپړه توګه ارزول سوي وو.» دغه وزارت زیاتوي: «امریکایان مجبور نه دي له هغو کسانو څخه چې هېڅ باید په دې هېواد کې نه وای، تاوتریخوالی وزغمي. موږ هغوی بېرته ستنوو.»
