د معمار خبری آژانس د راپور له مخې، د ملګرو ملتونو په سازمان کې د کاناډا دایمي استازولۍ اعلان کړی چې دغه هېواد به د افغان ولس، په ځانګړې توګه د ښځو او انجونو، له پیاوړي ملاتړ څخه لاس وانخلي.
دا دریځ په هغه ځانګړي ناستې کې څرګند سو چې د یو شمېر افغان فعالانو، د مدني ټولنې استازو او نړیوالو چارواکو په ګډون ترسره سوې وه. د کاناډا استازولۍ په خپله رسمي «ایکس» پاڼه کې لیکلي چې د ناستې موخه د نړیوالو د دایمي پاملرنې جلبول دي، په ځانګړې توګه د افغانستان د بشري حقونو او د ښځو د وضعیت په برخه کې.
په دې ناسته کې د ملګرو ملتونو د بشري حقونو ځانګړي راپور ورکوونکي ریچارد بنيټ هم ګډون درلود او د افغانستان د بشري حقونو د خراب وضعیت او د ښځو پر وړاندې د پراخو محدودیتونو په اړه یې خپلې اندېښنې څرګندې کړې.
د کاناډا استازولۍ ټینګار کړی چې د دې هېواد حکومت د افغان ولس د حقونو د دفاع لپاره په نړیواله کچه خپلې هڅې ته دوام ورکوي او له نړیوالې ټولنې یې غوښتي چې د افغانستان د روان انساني او بشري حقونو له بحران سره بېپروا پاتې نه سي.
