د افغان ساینس نندارتون، د ایران او افغانستان ترمنځ د علمي او ټکنالوژیکو همکاریو د پیاوړتیا فرصت

د معمار خبري آژانس د راپور له مخې؛ د دوشنبې په ورځ، د تلې ۷مه/۱۴۰۴، ډاکټر سید روح‌الله حسيني، په افغانستان کې د ج.ا.ایران کلتوري سلاکار، د ډاکټر علي سلطاني هروي، د افغان ساینس نندارتون علمي او اجرایي منشي، په ملتیا، د ډاکټر عبدالرضا جوان جعفري، د فردوسي نړیوال پوهنتون د رئیس، او د دې پوهنتون د رهبري هیئت سره ولیدل. د دې ناستې اصلي محور د ایران د علمي او اکاډمیکو بنسټونو د حضور څرنګوالی په نړیوال افغان ساینس نندارتون کې او د دواړو هېوادونو ترمنځ د علمي همکاریو پراختیا وه. په دې ناسته کې، د فردوسي پوهنتون رئیس د ایران او افغانستان ترمنځ د علمي او اکاډمیکو اړیکو اهمیت یاد کړ او ددې پوهنتون چمتووالی یې د علمي، څېړنیزو او ټکنالوژیکو ستراتیژیکو همکاریو لپاره اعلان کړ. د ج.ا.ایران کلتوري سلاکار په کابل کې هم د افغانستان علمي او ټکنالوژیکو بدلونونو ته په اشارې، د ګډو علمي پروګرامونو د ترسره کولو پر اهمیت ټینګار وکړ او د افغان ساینس نندارتون کې د ایران د معتبرو علمي بنسټونو حضور یې د علمي او کلتوري همکاریو د زیاتوالي لپاره اړین وبله. د افغان ساینس نندارتون علمي او اجرایي منشي د دې پروګرام اهداف تشریح کړل او ټینګار یې وکړ چې افغان ساینس د افغانستان لومړنی او تر ټولو مهم علمي، تعلیمي او ټکنالوژیک نندارتون دی چې د لوړو زده‌کړو وزارت، د معارف وزارت او د صنعت او سوداګرۍ وزارت په ملاتړ ترسره کېږي. نوموړي د ایران د پوهنتونونو حضور د افغانستان د علمي فعالیتونو د کمیټي او کیفي ارتقا لپاره خورا اغېزمن وبله. د افغان ساینس ځانګړی نندارتون (AFGHAN SCIENCE EXPO 2025) ټاکل سوې چې د ۱۴۰۴ د عقرب ۸مه (۲۰۲۵ د اکتوبر ۳۰مه) د کابل د نړیوال نندارتون په مرکز کې ترسره سي. دا پروګرام به د پوهنتونونو، څېړنیزو مرکزونو، سټارټاپونو، د روباټیک او ټکنالوژۍ فعالانو او د افغانستان او نړۍ د علمي بنسټونو په ګډون، د «علم او پوهه د افغانستان د تولید او ځان‌بساینې په خدمت کې» تر شعار لاندې ترسره سي. د کارپوهانو په باور، د ایران د معتبرو پوهنتونونو، په ځانګړي ډول د فردوسي مشهد پوهنتون، ونډه کولای سي د دواړو هېوادونو ترمنځ د علمي، څېړنیزو او ټکنالوژیکو همکاریو لارې نورې هم پیاوړې کړي.