د معمار خبری آژانس د راپور له مخې، درې افغان انجونې، چې د امریکا د مالي ملاتړ له پرې کېدو وروسته یې د زدهکړو دوام له خطر سره مخ سوی وو، په وروستیو کې د ریجاینا پوهنتون د بورس په ترلاسه کولو سره کاناډا ته انتقال سوې. یادې محصلینې د ۲۵ تر ۳۰ پورې د لومړۍ ډلې برخه دي، چې د ریجاینا پوهنتون په ملاتړ یې د لوړو زده کړو فرصت ترلاسه کړی دی.
د پوهنتون چارواکي وایي، د افغانستان د زدهکړو د بحراني وضعیت او د افغان محصلینو د بېسرنوشته پاتې کېدو له امله، دوی پرېکړه وکړه چې دا تحصیلي پروګرام پیل کړي. د راپورونو له مخې، دغو زدهکوونکو مخکې په قطر کې زدهکړې کولې، خو د امریکا د تعلیمي بودجې له پرې کېدو وروسته یې د زدهکړو دوام ممکن نه وو، او په یو نامعلوم وضعیت کې پاتې سوې وې.
د دې محصلینو انتقال کاناډا ته، د افغانستان د ښځینه استعدادونو د ژغورنې او د تعلیمي تباهۍ پر وړاندې یو هیله مند ګام بلل سوی دی. د ریجاینا پوهنتون ویلي، هڅه کوي د نورو افغان انجونو لپاره هم د خوندي او باکیفیته زدهکړې زمینه برابره کړي. دا اقدام په داسې حال کې ترسره کېږي چې طالبان لا هم انجونې له منځنیو او لوړو زدهکړو څخه منع کړي دي.
