د معمار خبری آژانس د راپور له مخې، د افغانستان د فوټسال ۱۷ کلنې ملي لوبډلې (یکشنبه، د لړم ۴مه) په بحرین کې د آسیايي سیالیو د ګروپي پړاو په درېیمه لوبه کې، د ۴ پر ۱ په پایلې سره چین ته ماتې ورکړه او د درې پرلپسې بریاوو په لرلو سره، د خپلې ډلې د لومړۍ لوبډلې په توګه بل پړاو ته صعود وکړ.
افغان لوبغاړو تر دې مخکې په لومړۍ لوبه کې ازبکستان د ۱۰ پر ۲ او په دوهمه لوبه کې د کوربه هېواد بحرین ټیم د ۷ پر ۰ مات کړی وو.
د دې لوبډلې افغان روزونکی، بهروز جعفري، او د هغه شاګردان، په ټولو درېیو لوبو کې د زړورتیا او تخنیک عالي ننداره وړاندې کړې، او د دغو سیالیو د تر ټولو خطرناک بریدیز ټیم په توګه یادېږي. په ګروپي جدول کې، چین له افغانستان وروسته دوهم مقام خپل کړی دی.
