د افغانستان صادرات پاکستان ته ۵۰ سلنه لوړ سوي

د معمار خبري آژانس د راپور له مخې؛ د پاکستاني رسنیو د سه‌شنبې په ورځ، د میزان په لومړۍ نېټه راپور ورکړی چې د افغانستان صادرات پاکستان ته د ۲۰۲۵ د اګست په میاشت کې د تېر کال د همدې مودې په پرتله ۵۰ سلنه زیات سوي او ۵۵ میلیونه ډالرو ته رسېدلي، په داسې حال کې چې د پاکستان صادرات افغانستان ته ۱۳ سلنه راکم سوي دي. د پاکستان نیشن ورځپاڼې راپور ورکړی چې د افغانستان صادرات د اګست په میاشت کې د جولای په پرتله ۱۶ سلنه زیات سوي دي. په راپور کې ویل سوي: «دغه زیاتوالی تر ډېره د پاکستان له افغانستان څخه د وارداتو د ۵۰ سلنه لوړوالي له امله دی، چې د ۲۰۲۵ جولای له ۳۷ میلیونه ډالرو څخه د اګست په میاشت کې ۵۵ میلیونه ډالرو ته لوړ سوي دي.» د راپور پر بنسټ، د پاکستان صادرات افغانستان ته له ۱۰۲ میلیونه ډالرو څخه ۸۸ میلیونه ډالرو ته راټیټ سوي چې ۱۳ سلنه کموالی ښيي. په راپور کې راغلي چې د افغانستان او پاکستان دوه اړخیز تجارت د اګست په میاشت کې ۱۴۳ میلیونه ډالرو ته رسېدلی دی. د پاکستان د وارداتو زیاتوالی له افغانستان څخه تر ډېره د زردالو د وارداتو د ستر لوړوالي له امله دی. د راپور له مخې، د افغانستان د پیازو، پنبې، سکرو او درملو صادرات کم سوي دي. دا په داسې حال کې ده چې پاکستان د افغانستان تر ټولو لوی سوداګریز شریک ګڼل کېږي.