د افغانستان د کړکیچ په حل کې د نړیوال ګډون نشتوالی!

د طالبانو د بهرنیو چارو وزارت سرپرست امیرخان متقی وايي، نړیوالې ټولنې او د افغانستان ګاونډیو هېوادونو د افغانستان په اړه خپل مسوولیتونه نه دي ترسره کړي. متقي په ” کار ملي کنفرانس” کې وویل چې نړۍ یوازې امرونه کوي، خو همکاري نه کوي. هغه زياته کړه، چې د طالبانو تر واک ته رسېدو وروسته خلک خوندي دي، خو اصلي ستونزه کار او اقتصاد دى. متقي ویلي دي چې د فقر او بیکارۍ کمول یوازې د طالبانو مسوولیت نه دی او نړیواله ټولنه هم باید له دې ډلې سره مرسته وکړي. په همدې حال کې نوموړي نشه يي توکي يوه نړيواله ستونزه وبلله او ويې ويل چې طالبانو يې “له منځه وړي” دي. د هغه په ​​وينا، اوس افغان کروندګر بديل معيشت ته اړتيا لري او روږدي کسان درملنې ته اړتيا لري، خو نړيوالې ټولنې په دې برخه کې خپل مسووليت نه دى ادا کړى. د کار ملي کنفرانس په داسې حال کې د طالبانو له خوا جوړېږي چې مرستندویه سازمانونو تل په افغانستان کې د بې وزلۍ د پراخېدو خبرداری ورکړی دی. په افغانستان کې بې وزلي او بېکاري یوه له هغو مهمو مسلو څخه ده چې خلک او حکومت ورسره لاس او ګریوان دي. که څه هم طالبانو د دې ستونزې د حل لپاره ډېرې هڅې وکړې، خو مطلوبه نتیجه یې ورنه کړه ځکه د فقر او بیکارۍ زیاتوالی هغه پدیده ده چې د حکومتولۍ د لارو چارو په اړه د طالبانو د سیاستونو پایله ده. لکه څنګه چې ښاغلي متقي یادونه کړې، نړیوالې ټولنې له طالبانو سره د بېکارۍ او نورو مسایلو په اړه همکاري نه ده کړې، خو آیا کله یې له ځانه دا پوښتنه کړې چې له دې ډلې سره د نړیوالو د نه همکارۍ لامل څه دی؟! د افغانستان د ستونزو په حل کې د نړیوالو د نه ګډون تر ټولو مهم لامل د طالبانو محدودیتونه دي چې وضعیت یې کړکېچن کړی او هېڅ هېواد په افغانستان کې د حضور لېوالتیا نه ښيي. طالبان په دې نه دي بریالي شوي چې د یوه جامع حکومت په جوړولو، بشري حقونو ته په درناوي او له نورو هیوادونو سره په بریالیتوب سره تعامل وکړي او دا کار د دې لامل شوی چې افغانستان انزوا ته لاړ شي او نړیوال مشارکت لږ تر لږه له منځه ولاړ شي. په اوسنيو حالاتو کې د ټول شموله حکومت جوړول او د ټولنې د ټولو طبقو د حقونو رعایت تر بل هر وخت ډېر اړین دی، تر څو د دغه مشارکت په سیوري سره په هیواد کې د فقر، بیکارۍ او نورو ننګونو ته د پای ټکی کیښودل شي. د طالبانو چارواکي باید دا حقیقت درک کړي چې د افغانستان په اداره کې د خلکو له ملاتړ او ګډون پرته د افغانستان ستونزې نه شي حل کېدای.