د معمار خبري اژانس د راپور له مخې؛ فیفا د فوټسال د ملي لوبډلو نوی نړیوال جدول خپور کړی چې له مخې یې د افغانستان د فوټسال ملي لوبډله په نړیوال رنکینګ کې د پنځو پلو په صعود سره د نړۍ ۲۸م مقام خپل کړی دی.
د دې درجهبندۍ پر بنسټ، افغانستان د نړۍ په کچه ۲۸م او د اسیا په کچه اووم مقام لري.
د فیفا په نړیوال جدول کې برازیل، پرتګال او هسپانیه په ترتیب سره لومړی، دوهم او درېیم ځایونه لري. همدارنګه په اسیا کې د ایران، تایلنډ او ویتنام د فوټسال ملي لوبډلې لومړني درې ځایونه خپل کړي دي.
دا صعود د اسیا د ملتونو جام د مقدماتي پړاو سیالیو او همدارنګه د اسلامي هېوادونو د لوبو په سیالیو کې د ترلاسه سوو نتیجو پایله ده.
په همدې حال کې، د افغانستان د فوټسال ملي لوبډله د ۲۰۲۶ کال د اسیايي جام د وروستي پړاو لپاره چمتووالی نیسي؛ هغه سیالۍ چې افغانستان پکې له ایران، سعودي عربستان او مالیزیا سره په یوه ګروپ کې شامل سوی دی.
تمه ده چې افغانستان د اسیا د فوټسال ملتونو جام کې د ښه ځلېدو او د قناعت وړ پایلو په ترلاسه کولو سره، خپل نړیوال مقام لا نور هم ښه کړي.
