د معمار خبري اژانس د راپور له مخې؛ د چين او پاکستان د بهرنيو چارو وزيرانو په ګډه اعلاميه کې د افغانستان، چين او پاکستان ترمنځ د درېاړخيزو خبرو د پرلهپسې کارونې او همکاريو پر دوام ټينګار کړی. هغوی همدا ډول ويلي چې د چين، پاکستان او بنګلهدېش ترمنځ د ګډو سيمهیيزو همکاريو چوکاټ به لا پياوړی کوي، څو د افغانستان د ټينګښت او سيمهیيزو چارو په برخه کې نوې لاستهراوړنې رامنځته سي.
په اعلاميه کې چې د ګډې ناستې څخه وروسته خپره سوې، دواړو لورو ژمنه کړې چې د افغانستان د موضوع په تړاو به تل نږدې اړيکي او همغږي وساتي. نوموړو همدارنګه ویلي چې د نړیوالې ټولنې ترڅنګ به د افغانستان حکومت هڅوي چې یو پراخه سیاسي چوکاټ جوړ کړي، منځلارې پالیسۍ ولري، ښه ګاونډیتوب ته ژمن وي او د ثبات او پراختیا په لاره کې رغنده رول ولوبوي.
د چين او پاکستان د بهرنيو چارو وزيرانو د دې ترڅنګ ټينګار کړی چې د افغانستان له خاورې څخه د نورو هېوادونو پر ضد د وېرې خپروونکو ډلو د کارونې مخه بايد ونيول سي؛ هغه اندېښنه چې په وروستيو کلونو کې تل د افغانستان په تړاو د سيمهیيزو خبرو بنسټيزه برخه وه.
دا په داسې حال کې ده، چې طالبان، د افغانستان د اوسنيو واکمنانو په توګه، وار په وار ويلي چې هېڅ هېواد ته به اجازه ورنهکړي چې د افغانستان له خاورې څخه د نورو هېوادونو پر ضد ناوړه ګټه واخلي.
