د معمار خبري آژانس د راپور له مخې؛ د هرات ولایت د طالبانو د والي دفتر په یوه رسمي اعلامیه کې خبر ورکړی چې په تېرو نهو میاشتو کې د دغه ولایت څخه د ۱۶ میلیونه او ۳۳۰ زره ډالرو په ارزښت تازه مېوې نورو هېوادونو ته صادرې سوې دي.
په هغه خبرپاڼه کې چې د یاد دفتر له لوري د یکشنبې په ورځ، د جدی په ۱۴ نیټه، خپره سوې، راغلي دي چې په دغه موده کې په ټولیز ډول ۲۲ زره او ۲۴ ټنه تازه مېوې د هرات ولایت څخه بهر ته لېږدول سوې دي.
طالبانو ادعا کړې چې د تازه مېوو دغه صادراتي بهیر د کروندګرو د عوایدو په لوړولو او د هرات ولایت د کرنې د سکتور په پیاوړتیا کې مهم رول لوبولی دی.
سره له دې، طالبانو د صادره سوو مېوو د ډولونو او د هغو هېوادونو په تړاو چې د یادو مېوو د صادراتو اصلي موخې وې، کره او تفصیلي معلومات نه دي وړاندې کړي.
تر دې وړاندې هم په هرات کې د طالبانو ادارې ادعا کړې وه چې د دغه ولایت څخه ځیني صنعتي وسایل د تاجیکستان هېواد ته صادر سوي دي.
