د معمار پرس د خبر له مخې؛ د طالبانو د حکومت د اطلاعاتو او کلتور وزارت اعلان کړی چې د وزارت د هنرونو د پوهنځي د مشر او په کابل کې د ایران د اسلامي جمهوریت د سفیر ترمنځ د غونډې په پایله کې، د افغانستان او ایران ترمنځ د ګډو هنري نندارتونونو د جوړولو لپاره هوکړې ته رسیدلي دي.
د طالبانو د اطلاعاتو او کلتور وزارت استازي د افغانستان او ایران ترمنځ تاریخي، ژبني او کلتوري اړیکو ته په اشارې سره وویل چې د ګډو هنري نندارتونونو جوړول د دواړو هېوادونو ترمنځ د کلتوري او هنري اړیکو په پیاوړتیا کې اغیزمن رول لوبولی شي.
هغه له ایران څخه وغوښتل چې په دې برخه کې اړینې همکارۍ وکړي.
د ایران سفیر د دې وړاندیز هرکلی وکړ او د ګډو هنري نندارتونونو کوربه توب او جوړولو لپاره یې د خپل هیواد چمتووالی اعلان کړ، او د دواړو هیوادونو ترمنځ د کلتوري تعاملاتو د پراخولو په ملاتړ یې ټینګار وکړ.
د دې غونډې په پای کې، علیرضا بیکدلي، د اطلاعاتو او کلتور وزارت د چارواکو سره یوځای، د ملي ګالري څخه لیدنه وکړه او د هنري اثارو ستاینه یې وکړه.
