د معمار خبري آژانس د راپور له مخې، د ازبکستان د ملي امنیت ادارې اعلان کړې چې په یو ځانګړې عملیات کې نږدې ۵۰ کیلوګرامه هغه مخدره مواد نیول سوي چې له افغانستانه دغه هېواد ته قاچاق سوي وو. د یوز نیوز د معلوماتو له مخې، دا عملیات د دوشنبې په ورځ په تاشکند کې ترسره سول، چې په ترڅ کې یې له افغانستانه ازبکستان ته د مخدره موادو یوه مهمه قاچاقي لار وموندل سوه او تړل سوی ده.
د عملیاتو پر مهال د امنیتي ځواکونو لخوا یو موټر د «کوبالت» په نوم د «چینور» د تېرېدونکې لارې په «آهنګرن» ولسوالۍ کې درول سوی او د قرغزستان د تابعیت لرونکي ۵۴ کلن کس څخه ۴ کیلو او ۸۹۷ ګرامه حشیش ترلاسه سوې دي.
د ازبکستان د ملي امنیت اداره زیاتوي، د یاد کس د ملګرو د پېژندلو او د قاچاق د پراخې شبکې د څېړلو هڅې لا هم روانې دي. دا په داسې حال کې ده چې، د افغانستان شمالي تګ لاره د منځنۍ آسیا له لارې اروپا او روسیې ته د مخدره موادو د انتقال له پېژندل سوو لارو څخه ګڼل کېږي، او ازبکستان، تاجکستان او ترکمنستان تل د دغې پدیدې پر ضد د هڅو راپورونه ورکوي.
