د معمار خبري آژانس د راپور له مخې، ورونیکا بوسکوویچ پوهار، د اروپایې اتحادیې کاردار په کابل کې د امام ابو حنیفه صنعتي نندارتون څخه لیدنه وکړه. دا نندارتون چې د اوو ورځو لپاره د افغانستان د نړیوال نندارتون په مرکز کې جوړ سوی او اوس مهال یې پنځمه ورځ روانه ده. په افغانستان کې د اروپایی اتحادیې کاردار په ایکس کې لیکلي چې د افغانستان خصوصي سکتور او کوچنۍ او منځنۍ سوداګرۍ د پراختیا په حال کې دي.
د میرمن پوهار په وینا، د افغانستان ځانبسیا کېدل د ټولو لپاره په زدهکړو ولاړ دي، او هممهاله یې په هېواد کې د معیاري تولیداتو پر اهمیت ټینګار کړی دی. د دې لیدنې په وخت کې، د افغانستان د سوداګرۍ او پانګونې خونې مرستیال د اروپا اتحادیې کاردار ته ویلي چې اروپا د افغانستان د تولیداتو لپاره یو مهم او بالقوه بازار دی. هغه زیاته کړې چې د هېواد خصوصي سکتور پوره چمتووالی لري چې که مناسب شرایط برابر سي، د افغانستان صادراتو ته د اروپایي بازار لوری پراخ کړي. د نندارتون اصلي موخه د سوداګریزو اړیکو پیاوړتیا، د کورنیو تولیدي ظرفیتونو معرفي او د بهرنیو بازارونو جلبول بلل سوي دي. په دې نندارتون کې کورني شرکتونه او یو شمېر بهرني شرکتونه ګډون لري او خپل بېلابېل تولیدات یې نندارې ته وړاندې کړي دي.
