جاپان له افغانستان سره ۱۳ میلیونه ډالره مرسته وکړه

د طالبانو د حکومت د اقتصاد وزارت نن سه شنبه (د ثور ۲۵مه) اعلان وکړ چې په افغانستان کې د جاپان سفیر تاکایوشي کورومیا د طالبانو د اقتصاد وزارت له سرپرست دین محمد حنیف سره لیدلي دي. د معمار پرس د خبر له مخې؛ د طالبانو د حکومت د اقتصاد وزارت وايي، په افغانستان کې د جاپان سفیر تاکایوشي کورومیا د افغانستان د اقتصاد له سرپرست وزیر سره په کتنه کې ویلي دي چی د هغه هېواد د افغانستان خلکو ته د روغتیایی خدمتونو د برابرولو او د پولیو واکسیناسیون لپاره څه باندې ۱۳ میلیونه ډالره ځانګړي کړي دي. د جاپان سفير د هېواد په بېلابېلو ولايتونو کې د وروستيو سېلابونو له قربانيانو سره د خواخوږۍ د څرګندولو په ترڅ کې د افغانستان له خلکو سره د خپلو بشري او بېړنيو مرستو د دوام ډاډ ورکړ. د طالبانو د حکومت د اقتصاد وزارت سرپرست هم د کرنې، روغتیا او د زیربناوو په برخو کې د پراختیايي پروژو پلي کول د افغانستان د خلکو په ګټه بللي دي.