د معمار خبري آژانس د راپور له مخې؛ د ایران اسلامي جمهوریت د چابهار د ازادې سیمې د ادارې د مدیره پلاوي مشر او عمومي رئیس محمد سعید اربابي، او په تهران کې د افغانستان په سفارت کې د طالبانو استازي فضلمحمد حقاني، په یوې لیدنه کې د افغانستان او ایران ترمنځ د ترانزیت د پراختیا او د سوداګرۍ د زیاتوالي لپاره د چابهار بندر پر کلیدي رول ټینګار وکړ.
دا لیدنه د چابهار د ازادې سیمې د مسؤلینو او د یو شمېر افغان سوداګرو په حضور کې ترسره سوه، چې پکې دواړو لورو چابهار د دواړو هېوادونو ترمنځ د اقتصادي راکړې ورکړې د پیاوړتیا له مهمو بسترونو څخه وبله.
په دې ناسته کې د چابهار بندر د ظرفیتونو د اغېزمنې استفادې لارې چارې وڅېړل سوې او د صادراتو اسانتیا، د سوداګریزو راکړو ورکړو د حجم زیاتوالی، د ترانزیتي لارو پراختیا او د افغان سوداګرو د اقتصادي فعالیتونو پر وړاندې د شته خنډونو لرې کول، د خبرو اترو له مهمو محورونو څخه وبلل سول.
دواړو لورو همدارنګه ټینګار وکړ چې د چابهار د ترانزیتي ظرفیتونو ښه کارونه کولای سي د ترانسپورټ لګښتونه راکم کړي، د افغانستان لاسرسی سیمهییزو او نړیوالو بازارونو ته اسانه کړي او دوهاړخیزې اقتصادي همکارۍ پیاوړې کړي.
د یادونې وړ ده چې چابهار کولای سي افغانستان له ازادو اوبو سره ونښلوي او د لنډې او ارزانه ترانزیتي لارې په توګه، د وارداتو او صادراتو لګښتونه راکم کړي، پر نورو لارو لکه پاکستان تکیه کمه کړي او د نړیوالو بازارونو ته د لاسرسي له لارې اقتصادي ثبات اسانه کړي.
