بګرام ته د امریکا بیا راتګ؛ طالبان: د افغانستان خاوره به بیا هېڅکله د بهرنیو ځواکونو کوربه نه وي

د معمار خبري آژانس د راپور له مخې؛ طالبانو د امریکا متحدو ایالتونو د ولسمشر، ډونالد ټرمپ، وروستیو څرګندونو ته په غبرګون کې ټینګار وکړ چې هېڅکله به اجازه ور نه کړي چې بګرام هوايي اډه یا د افغانستان بله هره برخه د بهرنیو ځواکونو په واک کې ورکړل سي. ډونالد ټرمپ، د امریکا د متحدو ایالتونو ولسمشر، په یوه مرکه کې له امریکايي رسنیو سره یو ځل بیا ادعا وکړه چې بګرام هوايي اډه باید د امریکا په اختیار کې وي او د هغې ستراتیژیک موقعیت چې د چین ترڅنګ دی، حیاتي اهمیت لري. هغه د دې اډې پرېښودل «لویه تېروتنه» وبلله. عبدالمتین قانع، د طالبانو د سرپرست حکومت د کورنیو چارو وزارت ویاند، د ټیلګراف ورځپاڼې سره په مرکه کې د ټرمپ څرګندونې «د کرکې او قدرت غوښتنې ډکې» وبللې او ویې ویل: «هېڅکله به اجازه ورنه کړو چې بګرام یا د افغانستان د خاورې بله برخه بیا د بهرنیانو تر اشغال لاندې راسي.» هغه زیاته کړه: «بګرام هوايي اډه اوس د افغانستان د حکومت تر بشپړ کنټرول لاندې ده او هېڅ سناریو د دې لپاره نه سي تصور کېدلی چې دا اډه امریکا یا کوم بل هېواد ته وسپارل سي.» قانع همدارنګه خبرداری ورکړ چې د افغانستان ولس به د هر ډول بهرني ګواښ پر وړاندې یو موټی او د مقاومت لپاره تیار وي. په داسې حال کې چې چین د طالبانو د دریځ ملاتړ کړی، د امریکایي ځواکونو احتمالي بېرته راتګ یې د تاوتریخوالي پاروونکې کړنه بللې او د افغانستان د حاکمیت د درناوي غوښتنه یې کړې ده. همدارنګه، پاکستان په دې اړه بېطرفه دریځ خپل کړی دي.