د معمار خبري اژانس د راپور له مخې؛ د ملګرو ملتونو د بشري مرستو د همغږۍ دفتر (اوچا) د شنبې په ماښام، د قوس ۲۹مه، په اېکس ټولنیزه شبکه کې په یوه پیغام کې اعلان کړی چې په افغانستان کې دوامداره وچکالي او اقلیمي بدلونونه د میلیونونو وګړو د پاکو اوبو لاسرسی په جدي توګه ګواښي.
اوچا زیاته کړې چې د اوبو د سرچینو کمښت او د اقلیمي بدلونونو پایلې، په افغانستان کې بشري وضعیت لا پسې بحراني کړی او د کورنیو پر معیشت یې دروند فشار راوستی دی.
د اوچا د راپور له مخې، د افغانستان د بشري صندوق په ملاتړ ځینې د ښځو پر محور ولاړې ادارې د هېواد په بېلابېلو سیمو کې اړمنو ټولنو ته د پاکو اوبو وېش او روغتیايي خدمتونه وړاندې کوي؛ خو دا هڅې د موجود بحران د پراخوالي د پوره ځواب ویلو توان نه لري.
اوچا ټینګار کړی چې د بشري بحران د لا پسې ژورېدو د مخنیوي لپاره، د اوبو، روغتیا او حفظالصحې په برخه کې د بشري مرستو بېړنی زیاتوالی اړین دی.
د ملګرو ملتونو اړوندو بنسټونو تر دې وړاندې هم څو ځله په افغانستان کې د اوبو د کمښت د بحران د پراخېدو او د خلکو پر ژوند، روغتیا او خوراکي امنیت د هغې د اغېزو په اړه خبرداری ورکړی وو.
