د معمار خبري آژانس د راپور له مخي؛ اوچا ویلي دي چې د ۲۰۲۶م کال لپاره یې په افغانستان کي د اړمنو وګړو د ملاتړ په موخه ۱.۷۱ میلیارده ډالره بودجه غوښتې ده.
دې ادارې زیاته کړې ده چې د ۲۰۲۶م کال لپاره یې د افغانستان د بشري اړتیاوو او ځواب ورکولو پلان د ۱.۷۱ میلیارده ډالرو په اړینه بودجه سره پیل کړی دی.
د اوچا د راپور پر بنسټ، په راتلونکي میلادي کال کي به نږدې ۲۲ میلیونه وګړي په افغانستان کي بشري مرستو ته اړتیا ولري. په دې ډله کي ۱۷.۴ میلیونه وګړي د خوراکي توکو د سختي ناامنۍ سره مخ دي، چې د هغوی د ژوند او اوسیدو وضعیت یې خورا نازک او زیانمن کړی دی.
اوچا ویلي دي چې د دې پلان په چوکاټ کي به ۱۷ میلیونه تر ټولو زیانمن او اغېزمن سوي وګړي د مرستو په لومړیتوب کي شامل سي، او بشري خدمات به پر حیاتي او بېړنیو اړتیاوو متمرکز وي.
دې د ملګري ملتونو ادارې خبرداری ورکړی دی چې افغانستان به په ۲۰۲۶م کال کي هم د نړۍ د تر ټولو لویو او پېچلو بشري بحرانونو څخه یو تجربه کړي.
