اندونیزیا د زلزله‌ ځپلو د مرستې لپاره ډاکټران کنړ ته ولېږل

د معمار خبري آژانس د راپور له مخې، د اندونیزیا د بیړنۍ روغتیايي مرستې او ژغورنې کمېټې (MER-C) د شنبې په ورځ، د میزان په ۵مه، اعلان وکړ چې د دغه هېواد د ډاکټرانو او روغتیايي کارکوونکو یو ټیم د وروستي زلزلې له زیانمنو سویو سره د مرستې لپاره د کونړ ولایت ته استول سوی دی. د دې بنسټ د اعلامیې پر بنسټ، استول سوی ټیم دوه ښځینه ډاکټرانې او یوه نرسه لري چې ټاکل سوې د اکتوبر تر ۹مې نېټې په سیمه کې پاتې سي او زیانمنو سویو خلکو ته روغتیايي او درملیز خدمات وړاندې کړي. په اعلامیه کې همدارنګه راغلي چې د شاوخوا ۵۰۰ کسانو د درملنې لپاره اړین درمل برابر سوي او ټاکل سوې چې د کنړ په څو کلیو کې وویشل سي. هدیګي حبیب، د MER-C د استول سوې هیأت مشر، ویلي: «هغه زلزله چې افغانستان یې ولړزاوه، جدي روغتیايي او ټولنیزې اغېزې پرېښودې، خو نړیوالې مرستې لا هم د خلکو د وضعیت د رسیدګۍ لپاره کافي نه دي.» ویل کیږي چې د روان کال د اګست میاشتې په پای کې یوې سختې زلزلې له ۲۲۰۰ زیات کسان مړه کړل، له ۳۶۰۰ ډېر یې ټپیان کړل او زرګونه تنه یې بې کوره کړل.