امسو: په افغانستان کې ۹۲ سلنه ښځینه خبریالانې له اجباري سانسور سره مخ دي

د معمار خبري آژانس د راپور له مخې؛ د افغانستان د رسنیو د ملاتړ سازمان (امسو) په یوه تازه راپور کې ویلي دي چې په افغانستان کې ۹۲ سلنه ښځینه خبریالانې د محدودیتونو او فشارونو له امله اړ سوې دي چې خپل راپورونه بدل یا سانسور کړي او یوازې ۶،۹ سلنه یې د فعالیت اجازه لري. یاد سازمان د دوشنبې په ورځ، د وږي ۳۱مه، په راپور کې زیاته کړه چې ۸۰ سلنه خبریالانو په تېر کال کې هېڅ ډول مالي او مسلکي ملاتړ نه دی تر لاسه کړی. د راپور له مخې، نیمايي خبریالانو د راتلونکي کال لپاره د کار د دوام هیله له لاسه ورکړې ده. امسو همدارنګه راپور ورکړی چې یوازې ۶،۹ سلنه ښځینه خبریالانې په افغانستان کې د فعالیت اجازه لري. دغه راپور ښيي چې ۵۵ سلنه خبریالان له ګواښ سره مخ سوي او ۱۵ سلنه نور د خپلو رسنیو له لارې ګواښل سوي دي. د دغه راپور د موندنو له مخې، ۵۵،۴ سلنه خبریالانو خپله دنده له لاسه ورکړې او ۵۰،۵ سلنه نور اړ سوي چې خپل راپورونه سانسور کړي. برسېره پر دې، ۴۶ سلنه ښځینه خبریالانو ته اجازه نه ده ورکړل سوې چې له نارینه وو سره مرکې وکړي او ۲۳ سلنه یې ویلي چې د کار پر مهال د محرم ملتیا ته اړ سوي دي. امسو دغه شمېرې د یوې سروي له لارې راټولې کړې دي چې د جولای او اګست په میاشتو کې د ښځینه خبریالانو په منځ کې ترسره سوی وه. په عین وخت کې، د طالبانو د واکمنۍ د څلورمې کلیزې سره هم مهاله، پر خبریالانو، په ځانګړي ډول ښځینه خبریالانو، ګواښونه، نیونې او محدودیتونه په شدت ډېر سوي دي.