د معمار خبري آژانس د راپور له مخې؛ د “ښځې د آزادۍ پر لور” غورځنګ د ښځو پر وړاندې د تاوتریخوالي د لهمنځه وړلو د نړیوال کمپاین په مناسبت یوه اعلامیه خپره کړې او ټینګار یې کړی چې د جنسیت پر بنسټ تاوتریخوالی د ښځو د بشري حقونو ښکاره سرغړونه ده او باید پر وړاندې یې بېپروايي ونسي. په خپره سوې اعلامیه کې ټینګار سوی چې د تاوتریخوالي د عاملانو د بخښنې د فرهنګ پای ته رسول د عدالت د تأمین او د قربانیانو د حقیقي ملاتړ لپاره اړین دي.
دغه غورځنګ له ملي او نړیوالو ادارو غوښتنه کړې چې د قوي او عملي اقداماتو له لارې، د تاوتریخوالي عاملین باید تعقیب کړل سي، او د قربانیانو لپاره د رواني، حقوقي او ټولنیز ملاتړ زمینه برابره کړي. اعلامیه همدارنګه خبرداری ورکوي چې د جنسیتي تاوتریخوالي په وړاندې بېپروایي نه یوازې د ښځو د ګډون او اجتماعي پرمختګ خنډ دی، بلکې د ټولنې بشري او ټولنیز امنیت هم ګواښي. “د ښځو د آزادۍ پر لور” غورځنګ د ښځو له هغو فعالو ډلو څخه دی چې په افغانستان او بهر کې د ښځو د حقونو لپاره مبارزه کوي او په وروستیو میاشتو کې یې د طالبانو د سختو محدودیتونو پر وړاندې سخت دریځونه څرګند کړي دي.
