د معمار خبري آژانس د راپور له مخي، یو نړیوال راپور چې د امریکا د جورجتاون پوهنتون پورې تړلي څېړنیز مرکز له خوا ترتیب سوی، افغانستان یی د ښځو لپاره د نړۍ تر ټولو بد هېواد په توګه معرفي کړی دی.
په دغه راپور کې چې د ۱۸۸ هېوادونو د ښځو وضعیت یې ارزولی، افغانستان د جدول په سر کې ځای لري او وروسته یې نور هېوادونه لکه یمن، د افریقا مرکزي جمهوریت، سوریه، سودان، هایټي او برونډي په ترتیب سره راتلونکي درجي لري.
دا راپور د ښځو وضعیت د امنیت، عدالت ته د لاسرسي، ټولنیزې او اقتصادي ونډې، او د تاوتریخوالي په کچه ارزوي. د راپور له موندنو سره سم، په تېر یو کال کې، په هغو هېوادونو کې چې د ښځو وضعیت تر ټولو خراب دی، لکه افغانستان، هره پنځمه ښځه په خپل کور کې د تاوتریخوالي ښکار سوې ده.
د جمهوریت سقوط، د طالبانو له خوا پر ښځو د تعلیم، کار او ټولنیز فعالیت سخت محدودیتونه، او د هغوی سیستماتیک لرې کول له عامه صحنې، افغانستان د ښځو لپاره یو ناامنه او له تاوتریخوالي ډک چاپیریال جوړ کړی دی.
د ښځو د حقوقو فعالان خبرداری ورکوي چې که نړیواله ټولنه د افغان ښځو د ملاتړ لپاره مؤثر اقدام ونه کړي، د ښځو د حقوقو بحران به په افغانستان کې لا پسې ژور سي.
