افغانستان د منځنۍ اسیا د بې ثباتۍ اصلي سرچینه ده!

د روسیې د دفاع وزیر اندرې بلوسف په خپله وروستۍ وینا کې افغانستان د منځنۍ اسیا په هېوادونو کې د «بې ثباتۍ» اصلي سرچینه بللې ده. هغه ویلي دي: په افغانستان کې اوسنی وضعیت د بې ثباتۍ اصلي لامل دی. یو شمیر افراطي ډلو هلته ځای نیولی او په ګاونډیو هیوادونو کې یې د خپلو افراطي افکارو د پراختیا هڅې زیاتې کړي دي. د بلوسف په وینا، له افغانستان څخه منځنۍ اسیا ته د ډلو ټپلو او ترهګرۍ د خپریدو خطر شته، نو د سیمې د امنیت او ثبات د تامین لپاره باید زیات امنیتي تدابیر ونیول شي. د افغانستان د ژغورنې لپاره د مقاومت شورا دغه څرګندونې د روسي چارواکو د څرګندونو په غبرګون کې کړې دي چی دغه هېواد بايد خپلې ملي ګټې له يوې غير مسوولې افراطي ډلې سره په تعامل کې متمرکزې نه کړي، بلکې روسيه بايد خپلې تګلارې تعقيب کړي او خپلې اړيکې د افغانانو پر بنسټ پرمخ بوځي. د مقاومت شورا ویلي دي چې طالبان اوس مهال د ۲۲ ترهګرو ډلو کوربه دي چې د سیمې او نړۍ امنیت یې ګواښلی دی. دغې شورا ټینګار وکړ چې له افغانانو سره د تعامل ژوند اوږد دی او د هغې مثبتې پایلې به مثبتې او تلپاتې اغیزې ولري. دا څرګندونې په داسې حال کې کېږي، چې د طالبانو له واکمنۍ وروسته بېلابېلو هېوادونو په ځانګړې توګه د امنیتي تړون غړو هېوادونو په پرله پسې ډول له افغانستان څخه د ترهګرۍ د ګواښ پر زیاتېدو اندېښنه ښودلې ده. په هرصورت، تیره اونۍ د ولسمشر ولادیمیر پوتین او د بهرنیو چارو وزیر سرګي لاوروف په ګډون روسي چارواکو د “افغانستان واقعیت” په توګه له طالبانو سره د خبرو اترو اړتیا وبلله چی ځینو روسي بنسټونو د ترهګرو ډلو له لیست څخه د طالبانو د ایستلو وړاندیز کړی و. داسې ښکاري چې د افغانستان په اړه د روسي چارواکو په خبرو او چلند کې یو ډول ټکر او دوه ګونی شتون لري. یو شمېر روسي چارواکي غواړي چې طالبان د ترهګرو ډلو له نوملړ څخه وباسي خو یو شمېر نور بیا افغانستان د ترهګرو ډلو د حضور مرکز ګڼي، چې د سیمې امنیت ګواښي او افراطي افکارو ته وده ورکوي. د روسي چارواکو له دا ډول څرګندونو سره دا په ډاګه کیږي چې د طالبانو او د هغوی د کړنو په اړه یو واحد نظر نشته او په دې کې یوازې د روسیې ګټې پرېکنده دي؛ ځکه که د افغانانو حق ته لومړیتوب ورکړل شوی وای، نو څرګندونې او پرېکړې به په بل ډول شوي وای.